Xitoyga chiplar boʻyicha cheklov AQSh mudofaa qonuniga kiritiladi
Payshanba kuni Nvidia bosh direktori lavozimini tark etgan Jensen Huang atrofidagi mojaro bunga qoʻshimcha turtki berdi
AQSh Vakillar palatasi qoʻmitasi raisi Brayan Mast ilgʻor Amerika chiplarining Xitoyga eksportiga qoʻyiladigan cheklovlar «katta ehtimol bilan» har yili qabul qilinadigan mudofaa qonuniga kiritilishini aytdi.
Mastning maʼlum qilishicha, AQShning har yili qabul qilinadigan mudofaa qonuni paketiga ilgʻor chiplar eksporti boʻyicha uchta qonun loyihasi kiritilishi mumkin. Uning soʻzlariga koʻra, bunga Jensen Huang atrofidagi mojaro qoʻshimcha turtki bergan. Huang payshanba kuni uning Xitoy uchun ishlayotgani gumon qilinayotgan shaxs bilan nikohdan tashqari munosabati haqidagi xabarlar tarqalgach, Nvidia bosh direktori lavozimini tark etgan.
Qonun loyihalaridan biri — Chip Security Act — kontrabandadan himoyalanishni nazarda tutadi: ilgʻor chiplar joylashuvni tekshirish mexanizmlari bilan jihozlanishi kerak boʻladi. Boshqa hujjat chip ishlab chiqarish uskunalariga qoʻyiladigan cheklovlarni kuchaytiradi va boshqa mamlakatlarni ham shunga oʻxshash choralarni joriy etishga undaydi. Uchinchi loyiha Kongressga sunʼiy intellekt tizimlari uchun ilgʻor chiplarni yetkazib berish litsenziyalarini tekshirish imkonini beradi.
AQSh prezidenti Donald Tramp avvalroq eksport cheklovlarini kuchaytirishga sovuqqon munosabatda boʻlgan va Nvidiaʼga Xitoyga kuchliroq chiplarni sotish imkonini beradigan bitimlarni maʼqullagan. Mast Savdo vaziri Govard Latnikka boʻlgan ishonchini saqlab qolayotganini aytdi, biroq Sanoat va xavfsizlik byurosida eksport nazoratini boshqaradigan Jeffri Kesslerga ham ishonishini tasdiqlashdan bosh tortdi.
Qoʻmita raisi, shuningdek, Nvidia atrofidagi vaziyatda byuroning rolini tekshirmoqchi. Mast Huang jamoasi bilan uning qonun chiqaruvchilar oldida chiqish qilishi boʻyicha muzokaralar olib bormoqda va kompaniyaning sobiq rahbarini bir hafta ichida koʻrishni kutmoqda. Muzokaralar toʻxtasa yoki vijdonan olib borilmasa, u chaqiruv qogʻozi yuborilishini istisno qilmadi. Nvidia va Sanoat va xavfsizlik byurosi izoh soʻrab yuborilgan soʻrovlarga javob bermadi.
