Oʻzbekiston aholisi isteʼmol xarajatlarining 44,8 foizi oziq-ovqat mahsulotlariga toʻgʻri keladi
Bu AQSh Qishloq xoʻjaligi vazirligining 2025-yildagi xarajatlar boʻyicha jahon tadqiqoti natijalari
Oʻzbekiston Milliy statistika qoʻmitasi 2026-yil mart oyida boshqa bir baholashni keltirgan edi. Qoʻmita maʼlumotlariga koʻra, 2025-yilda oziq-ovqat mahsulotlari xonadonlarning isteʼmol xarajatlarida 56,5 foizni tashkil etgan.
Farq hisoblash metodikasi bilan bogʻliq. AQSh Qishloq xoʻjaligi vazirligi statistikasida faqat uyda isteʼmol qilish uchun xarid qilingan oziq-ovqat mahsulotlari hisobga olinadi. Kafe va restoranlarda ovqatlanish xarajatlari, shuningdek, alkogol va tamaki mahsulotlariga sarflangan mablagʻlar bu koʻrsatkichga kiritilmaydi.
Daromadlar oshgani sari xonadonlar odatda budjetining kichikroq qismini oziq-ovqatga sarflaydi. Shu bilan birga, taʼminlangan oilalar mutlaq ifodada daromadi past oilalarga qaraganda oziq-ovqat mahsulotlariga koʻproq mablagʻ sarflashi mumkin. Shu sababli xarajatlar foizi oziq-ovqat savati qancha turishini bevosita koʻrsatmaydi.
Shunga qaramay, oziq-ovqatga sarflanadigan mablagʻ ulushining yuqoriligi xonadonlarning moliyaviy zaifligidan dalolat berishi mumkin. Agar budjetning katta qismi oziq-ovqat mahsulotlariga sarflansa, ular narxining oshishi oilalarning boshqa zarur xarajatlarni toʻlash imkoniyatlarini koʻproq cheklaydi.
