Mutaxassislarni oʻqitish uchun biznesga soliq imtiyozlari taklif etiladi
Tadbirkorlar kadrlar tayyorlash uchun soliq chegirmalaridan, bitiruvchilarni xorijda ishga joylashtirish uchun esa grantlardan foydalanishi mumkin boʻladi
Mehnat migratsiyasi masalalariga bagʻishlangan yigʻilishda Prezident Shavkat Mirziyoyev biznesni malakali mutaxassislar tayyorlashga faolroq jalb etishni taklif qildi. Yirik tadbirkorlarga har bir hududda ikkitadan-uchtadan texnikumni 15 yil muddatga boshqaruvga berish rejalashtirilmoqda. Ularda har yili kamida 30 ming kishini oʻqitish koʻzda tutilgan.
Tadbirkorlarga oʻqitish va uskunalar xaridiga sarflangan xarajatlarni soliq toʻlashda hisobga olishga ruxsat beriladi. Shuningdek, xorijda ish topadigan bitiruvchilar uchun grantlar ajratish ham koʻzda tutilgan.
Ayrim qoʻllab-quvvatlash choralari xususiy bandlik agentliklariga ham taalluqli boʻladi. Kelasi yildan boshlab fuqarolarni xorijda ishga joylashtirish vazifasini ularga berish rejalashtirilmoqda. Yuqori maoshli ishga joylashtirilgan har bir kishi uchun agentliklar 1,5 mln soʻm oladi. Ularning faoliyati ishga joylashtirish natijalari, xodimlar huquqlariga rioya etilishi va mehnat sharoitlari asosida baholanadi.
Yangi chora-tadbirlarni amalga oshirish boʻyicha hujjat loyihasini bir oy ichida tayyorlash topshirildi.
