Gʻildirakli barja: Apple va Uber kompaniyalarining sobiq muhandisi avtonom yuk mashinalari uchun $51 mln jalb qildi
Humble Robotics tijoriy yuk tashishni 2027 yilning III choragida boshlashi kerak
Humble Robotics Obvious Ventures boshchiligidagi raundda $51 mln jalb qildi. Unda kompaniyaning amaldagi investorlari Eclipse va Energy Impact Partners ham qatnashdi, startapning jami moliyalashtirish hajmi esa $75 mln ga yetdi. Kompaniya bahosi oshkor qilinmadi.
Kompaniya asoschisi va bosh direktori Eyal Koen avval Appleʼning yopilgan haydovchisiz avtomobil loyihasi, Uberʼning avtonom boshqaruv yoʻnalishi hamda Waabi startapida ishlagan. U oʻtgan yili Humble kompaniyasiga asos solib, yuk mashinasi va avtonom boshqaruv tizimini bir vaqtning oʻzida ishlab chiqish orqali ustunlikka erishishni koʻzlagan.
Kompaniya hozircha tijoriy yuk tashishni boshlamagan. Humble 2027 yilning birinchi choragida maʼlumot toʻplash uchun oddiy yuk mashinalarida mijozlar bilan sinov loyihalarini oʻtkazishni rejalashtirmoqda. Shundan keyin yoʻnalishlar modellashtirilib, virtual muhitda tekshiriladi, soʻng kompaniya oʻzining Humble Hauler avtomobilidan foydalanishni moʻljallamoqda. Koen tijoriy ishga tushirishni 2027 yilning uchinchi choragida kutmoqda.
Startap portlar, omborlar va taqsimlash markazlari oʻrtasidagi uzunligi 250 milyadan kam boʻlgan mintaqaviy yoʻnalishlarga eʼtibor qaratmoqda. Koenning fikricha, avtonom mashinalar tungi smenalarda va takrorlanuvchi yoʻnalishlarda ishlashi, haydovchilarni esa boshqa ishlar uchun boʻshatishi mumkin.
Humble 40 futlik konteynerlarni tashishga moʻljallangan, kabinasiz elektr yuk mashinasini ishlab chiqmoqda. Hozir prototip vaqtinchalik kabina bilan Kaliforniya universiteti, Berkli tadqiqot va ishlanmalar maydoni sifatida foydalanadigan sobiq dinamit fabrikasi hududida sinovdan oʻtkazilmoqda. Mashina hozircha inson nazorati ostida harakatlanmoqda.
Humble kompaniyasida Kaliforniyada xavfsizlik haydovchisi ishtirokidagi sinovlarni oʻtkazish uchun ruxsat bor. Shtatda haydovchisiz sinovlar va tijoriy yuk tashish uchun qoʻshimcha tartibga solish jarayonlari talab etiladi. Kelajakda Koen turli yuk turlari va yoʻnalishlari uchun avtonom mashinalar oilasini yaratmoqchi.
