Raqobat qoʻmitasi mikrozaym oluvchilarni ogohlantirdi
Mutaxassislar kechikish sabab qarz oluvchilardan qarzning qolgan qismini muddatidan oldin toʻliq toʻlash talab qilingan holatlar haqida maʼlumot berdi
Bir kelishuv tahlili shuni koʻrsatdiki, mikrozaymning nominal miqdori 19 mln 656 ming soʻm boʻlgan. Qarz oluvchining kartasiga 13 mln 650 ming soʻm oʻtkazilgan, 6 mln 6 ming soʻmni esa operator toʻlov sifatida avtomatik tarzda ushlab qolgan. Shunga qaramay, shartnomada koʻrsatilgan toʻliq summani qaytarish kerak boʻlgan.
Idora mobil ilovada mikrozaym olish uchun ariza topshirish bir necha daqiqa vaqt olishini taʼkidlaydi. Jarayonning soddaligi sabab isteʼmolchilar koʻpincha shartnomani toʻliq oʻqimaydi, toʻlovni kechiktirish oqibatlarini baholamaydi va kutilmagan moliyaviy majburiyatlarga duch keladi.
Fuqarolik kodeksining 736-moddasi qarz boʻlib-boʻlib qaytarilayotgan va navbatdagi toʻlov muddati buzilgan taqdirda kreditorga qarzning qolgan qismini muddatidan oldin toʻlashni talab qilish imkonini beradi. Rasmiylashtirishdan oldin amalda beriladigan summa, qaytariladigan umumiy mablagʻ, oylik toʻlovlar miqdori va muddatlari, shuningdek, toʻlovni kechiktirish oqibatlarini aniqlab olish kerak. Isteʼmolchilar huquqlari buzilgani haqida 1159 ishonch telefoniga xabar berish mumkin.
