Jensen Huangning qulashidan eng katta foyda oluvchi — Xitoy
Tahlilchilar uning ketishi AQShning sunʼiy intellekt sohasidagi yetakchiligini zaiflashtirib, Xitoyga foyda keltirishi mumkin, deb hisoblamoqda
The New York Times manbasiga koʻra, Nvidia direktorlar kengashi Huangning qoʻl ostidagi xodimasi va xitoylik josus boʻlishi mumkin deb atalgan ayol bilan munosabatlari haqidagi xabarlar ortidan uning ehtimoliy isteʼfosini koʻrib chiqmoqda. Kompaniya rahbarining ketishi boʻyicha hozircha rasmiy qaror yoʻq.
Bu xabarlar fonida Nvidia aksiyalari birjadan tashqari savdolarda taxminan 8 foizga arzonladi. Kompaniyaning bozor qiymati 300 mlrd dollardan koʻproqqa kamaydi — nashr bu summani Nvidiani sunʼiy intellekt bozorining asosiy oʻyinchilaridan biriga aylantirgan rahbarni yoʻqotishning ehtimoliy narxi deb atamoqda.
Bernstein Research tahlilchisi Steysi Rasgon aniq voris boʻlmasa, Huangning ketishi AQShning sunʼiy intellekt sohasidagi yetakchiligini yanada beqaror qilishi mumkinligidan ogohlantirdi. U, shuningdek, Nvidia aksiyalarining maqsadli narxini 400 dollardan 200 dollargacha pasaytirdi. Uning baholashicha, bunday vaziyatdan eng katta foyda oluvchi oʻzining sunʼiy intellekt imkoniyatlarini faol rivojlantirayotgan Xitoy boʻladi.
Circular Technology kompaniyasining global tadqiqotlar rahbari Bred Gastvirt ham shunga oʻxshash fikr bildirdi. Uning hisoblashicha, Huangning isteʼfosi Nvidia faoliyatini izdan chiqarishi va AQShning texnologik yetakchiligi uchun muammolar tugʻdirishi mumkin.
Direktorlar kengashi ayni paytda ayblovlar va ular bilan bogʻliq kompaniya uchun xatarlarni baholashi kerak. Agar tergov Huangning keyingi faoliyatini imkonsiz qiladigan holatlarni aniqlamasa, uni ishdan boʻshatish strategik xato boʻlishi mumkin, deb hisoblamoqda tahlilchilar.
