Morgan Stanley sanoat sektoriga tikmoqda
Texnologiya gigantlari aksiyalaridagi pasayishning yakunlanishi, AQShdagi oraliq saylovlar va Moliya vazirligi taqdim etishi mumkin boʻlgan likvidlik S&P 500 indeksini 8000 punktgacha koʻtarishi mumkin
Morgan Stanley tahlilchilarining fikricha, fond bozoridagi hozirgi uzoq davom etgan pasayish yakuniga yaqinlashmoqda va investorlar tez orada vaziyat yaxshilanishini kutishlari mumkin. S&P 500 indeksi iyundan beri deyarli oʻzgarmagan boʻlsa-da, oxirgi oy, ayniqsa sunʼiy intellekt xarajatlari bilan bogʻliq xavotirlar sabab 9 foizga qulagan texnologik Nasdaq uchun nihoyatda notinch kechdi. Shunga qaramay, eng ogʻir davr ortda qoldi.
Bankning bosh investitsiya direktori Maykl Uilsonning aytishicha, sotuvlar bozor yetakchilarigacha yetib bordi — bu odatda burilishdan oldingi tuzatishning yakuniy bosqichini anglatadi.
Davlat obligatsiyalari daromadliligi pasaymoqda, AQSh Federal zaxira tizimi foiz stavkalarini oʻzgartirishni toʻxtatib turibdi, AQSh Moliya vazirligi esa oʻz zaxiralaridan iqtisodiyotga qariyb 1 trln dollar yoʻnaltirishni boshlashi mumkin. Bu bozorga qoʻshimcha mablagʻ olib kiradi.
Tarixan AQShdagi oraliq saylovlardan keyingi olti oy davomida yirik kompaniyalar aksiyalari oʻrtacha qariyb 15 foizga oʻsadi.
Bozor hali toʻliq burilmagan: yil oxirigacha 8000 punktlik maqsadli koʻrsatkich sari yakuniy oʻsishdan oldin S&P 500 biroz pastlashi mumkin. Shunga qaramay, tahlilchilar kuchli biznesga ega «sifatli tsiklik kompaniyalar»ga eʼtibor qaratishni tavsiya qilmoqda. Asosiy favorit sanoat sektori boʻldi — masalan, Delta Air Lines, Knight-Swift va Northrop Grumman aksiyalari. Shuningdek, iShares MSCI USA Quality Factor ETF kabi maxsus fondlarga ham eʼtibor qaratish tavsiya etilmoqda.