Endi biznes elektr energiyasi va gaz uchun har oy faqat 15 foiz oldindan toʻlaydi
Avval tadbirkorlar 100 foiz oldindan toʻlov qilgan; yangi qoidalar 1 noyabrdan kuchga kirdi
1 noyabrdan avtomatlashtirilgan nazorat va hisobga olish tizimlariga ulangan, shuningdek, masofadan oʻchirish va yoqish imkonini beruvchi hisoblagichlarga ega tadbirkorlar elektr energiyasi va tabiiy gazning oylik qiymatining 15 foizini oldindan toʻlashlari kerak. Bu qoida soʻnggi ikki oy davomida toʻlov intizomini buzgan isteʼmolchilarga nisbatan qoʻllanmaydi.
Qolgan summani oy davomida bir necha transhga boʻlib toʻlashga ruxsat beriladi. Bu tadbirkorlar endi taʼminotchi tashkilotlarga elektr energiyasi va gaz isteʼmoli haqida yozma maʼlumot yuborishlari ham shart emas.
Har ikki resursni yetkazib berish boʻyicha shartnomalar onlayn tarzda tuziladi. Bunday kelishuvlarni qogʻoz shaklida rasmiylashtirish bekor qilinadi.
