Oʻzbekiston pedagoglari ipoteka subsidiyasi uchun onlayn ariza berishlari mumkin
Qayta moliyalashtiriladigan ipoteka boʻyicha dastlabki badalning 25 foizini budjet qoplaydi
Portal yoki ilovaga kirgach, «Uy-joy sotib olish uchun pedagoglarga subsidiya» xizmatini topish, maʼlumotlarni kiritish va arizani yuborish kerak. Davlat xizmatlari markazlariga ham murojaat qilish mumkin — bu tartib bepul.
Dasturga Vazirlar Mahkamasining 2026-yil 19-fevraldagi qarori asos boʻladi. Qoʻllab-quvvatlashdan 60 yoshga toʻlmagan, kamida 15 yillik ish stajiga va bosh oʻqituvchi lavozimiga mos keladigan oliy malaka toifasiga ega pedagoglar foydalanishlari mumkin.
Dastur ishtirokchilari taʼlimning barcha bosqichlaridagi muassasalar xodimlari boʻlishi mumkin: maktablar va akademik litseylardan tortib, texnikumlar, kollejlar hamda oliy taʼlim muassasalarigacha. Subsidiya doimiy yashash joyi boʻyicha birlamchi bozordan kvartira sotib olish uchun moʻljallangan. Toshkent aholisi uchun Toshkent viloyatidan uy-joy sotib olish imkoniyati ham mavjud.
Arizani koʻrib chiqishda ish staji, hozirgi ish joyi, malaka toifasi, kredit tarixi, shuningdek, pedagog va uning eri yoki xotiniga tegishli koʻchmas mulk haqidagi maʼlumotlar hisobga olinadi. Er-xotin nomiga ikki yoki undan ortiq turar joy obyekti rasmiylashtirilmagan boʻlishi kerak. Shuningdek, ularning hech biri avval uy-joy subsidiyasini olmagan boʻlishi lozim.
Dasturni davlat budjetidan har yili moliyalashtirish hajmi 200 mlrd soʻmgacha boʻlishi mumkin.
