Oʻzbekistondagi startaplar $5 mlnlik jamgʻarma investitsiyalari uchun kurashishi mumkin
Oʻzbekiston 2027-yil aprelidan boshlab har yili Land of Startups tanlovini oʻtkaza boshlaydi
Vazirlar Mahkamasi xalqaro Land of Startups tanlovini oʻtkazishni tasdiqladi. Tanlovdan koʻzlangan maqsad Oʻzbekistonga xorijiy startaplar va ularning asoschilarini jalb qilish, texnologiyalar transferini tezlashtirish hamda mamlakatning mintaqaviy startap-hab sifatidagi rolini mustahkamlashdan iborat.
Ishtirokchilar besh yoʻnalishda bellashadi: sunʼiy intellekt; taʼlim, sogʻliqni saqlash va davlat xizmatlari uchun raqamli yechimlar; moliyaviy texnologiyalar; kreativ industriyalar hamda kompyuter va mobil oʻyinlar ishlab chiqish; biznes va sanoat uchun yechimlar.
25 ta gʻolib jamoaning har biri IT Park direksiyasi huzuridagi venchur fondidan $200 minggacha investitsiya olishga daʼvogarlik qilishi mumkin. Mablagʻlar loyiha va jamoani kompleks tekshirish — due diligence jarayonidan soʻng ajratiladi.
Qaror IT Park faoliyati qoidalariga ham oʻzgartirishlar kiritadi. Avtomatlashtirish sohasida rezidentlar tomonidan ishlab chiqilgan hisobga olish va oʻlchash vositalarini soliq organlarining axborot tizimlari bilan majburiy integratsiya qilish talabi bekor qilinadi.
IT Park direksiyasi endi soliq va statistik hisobotlarni topshirishi, shuningdek, axborot texnologiyalari boʻyicha oʻtkazilgan oʻquv kurslari haqidagi maʼlumotlarni taqdim etishi shart boʻlmaydi.
Rezidentlar uchun ruxsat etilgan yoʻnalishlar roʻyxatiga buyumlar interneti va sunʼiy intellekt qurilmalarini, mikro- va nanoelektronika mahsulotlarini hamda intellektual robotlarni ishlab chiqarish va sotish qoʻshiladi. Roʻyxatda biznes farishtalari klublari faoliyati ham paydo boʻladi.
