Oʻzbekiston banklaridagi muammoli kreditlar 25 trln soʻmdan oshdi

Banklar tomonidan ajratilgan kreditlarning umumiy hajmi 659,09 trln soʻmga yetdi. Shu bilan birga, kredit portfeli sifati moliya institutlarining mulkchilik shakliga qarab anʼanaviy tarzda farq qiladi.

Davlat banklari: kredit portfeli 425,82 trln soʻmni tashkil etdi. Muammoli kreditlar hajmi 16,94 trln soʻm boʻlib, NPLning oʻrtacha ulushi 4 foizga yetdi.

Boshqa banklar (xususiy va xorijiy kapital ishtirokidagi): jami portfel — 233,27 trln soʻm, NPL hajmi — 8,1 trln soʻm yoki 3,5 foiz.

Reklama

Muammoli qarzlar ulushi boʻyicha Madad Invest Bank antirekordni saqlab turibdi: 587 mlrd soʻmlik portfelning 43,4 foizi, yaʼni 255 mlrd soʻmi NPL hissasiga toʻgʻri keladi.

Muddati oʻtgan qarzdorlik ulushi yuqori boʻlgan banklar qatoriga quyidagilar ham kiradi: Poytaxt Bank — 13,8 foiz (103 mlrd soʻm); TBC Bank — 13,4 foiz (1,04 trln soʻm); Mikrokreditbank (davlat banklari orasida NPL boʻyicha yetakchi) — 11,4 foiz (24,04 trln soʻmlik portfelda 2,74 trln soʻm); Anorbank — 9 foiz; AVO Bank — 6,9 foiz; Garant Bank — 6,1 foiz; Business Development Bank — 5,8 foiz.

Eng yirik davlat banklari — Asakabank va Xalq Bank —ning har birida NPL ulushi 4,1 foizni tashkil etdi.

Mamlakatda ajratilgan kreditlar hajmi boʻyicha Oʻzmilliybank (NBU) 104,08 trln soʻmlik portfel bilan va Agrobank 95,89 trln soʻmlik portfel bilan yetakchilikni saqlab qolmoqda. Keyingi oʻrinlarda Uzsanoatqurilishbank (59,32 trln soʻm), Kapitalbank (39,89 trln soʻm) va Asakabank (39,31 trln soʻm) turadi.

Biznes koʻlami hisobiga Oʻzmilliybank va Agrobank muammoli qarzlarning mutlaq hajmi boʻyicha ham roʻyxatni boshqarmoqda — mos ravishda 3,11 trln va 3,18 trln soʻm.

Regulyator statistik maʼlumotlariga koʻra, uchta moliya institutida muammoli kreditlar umuman mavjud emas (NPL 0 foiz): KDB Bank Uzbekistan (portfeli 4,04 trln soʻm), Octobank (833 mlrd soʻm) va Uzum Bank (450 mlrd soʻm).