Chet eldagi mehnat staji Oʻzbekistonda pensiya tayinlashda hisobga olinadi
Shavkat Mirziyoyev oʻzbekistonliklarning boshqa mamlakatlarda orttirgan mehnat stajini tan olish boʻyicha muzokaralarni tezlashtirishni topshirdi
2 noyabr kuni boʻlib oʻtgan yigʻilishda Mirziyoyev Oʻzbekistonda pensiya tayinlashda chet eldagi mehnat stajini hisobga olish imkonini beradigan bitimlarni tezroq tuzishni topshirdi. Uning soʻzlariga koʻra, oʻzbekistonliklar 40 dan ortiq mamlakatda qonuniy ravishda ishlamoqda, ularning koʻpchiligida esa soliqlar bilan birga pensiya badallarini ham toʻlamoqda.
Hozirda chet elda orttirilgan staj va u yerda toʻlangan pensiya badallari koʻp hollarda Oʻzbekistonda hisobga olinmaydi. Prezident mehnat migrantlari vataniga qaytganidan soʻng, ularning staji pensiya tayinlashda hisobga olinishi kerakligini taʼkidladi.
Bu yil Oʻzbekiston Qirgʻiziston, Ozarbayjon va Turkiya bilan mehnat staji hamda pensiya huquqlarini tan olish boʻyicha bitimlar tuzdi. Mirziyoyev Rossiya, Janubiy Koreya, Yaponiya, Germaniya, Boltiqboʻyi va Bolqon mamlakatlari bilan xuddi shunday muzokaralarni faollashtirishni topshirdi.
Iqtisodiyot va moliya vaziri Jamshid Kuchkarov, bandlik vaziri Botir Zohidov va boshqa masʼul shaxslar mazkur mamlakatlardagi hamkasblari bilan muzokaralar oʻtkazishi kerak. Ularga yil oxirigacha ishning aniq natijalari haqida hisobot taqdim etish topshirildi.
