Gonkongda yil boshidan beri IPO hajmi olti yil ichidagi eng yuqori darajaga chiqdi
Faqat shu yilning oʻzida oʻnta kompaniya 1 milliard dollardan ortiq mablagʻ jalb qilgan holda IPO oʻtkazdi
2026-yil boshidan beri kompaniyalar Gonkongdagi IPOlar orqali 51,9 milliard dollar jalb qildi. Bu 2020-yil davomida amalga oshirilgan joylashtirishlarning 51,6 milliard dollarlik jami hajmidan yuqori.
2010-yilda oʻrnatilgan yillik rekordga hali erishish mumkin: oʻsha yili kompaniyalar IPO orqali 57,8 milliard dollar jalb qilgan. Bu yil oʻnta kompaniya 1 milliard dollardan ortiq mablagʻ jalb qilgan holda joylashtirish oʻtkazdi. Ular orasida Zhongji Innolight va Luxshare Precision Industry ham bor. 2010-yilda bunday IPOlar soni yettita boʻlgan, oʻsha yilgi tushumlarning uchdan biridan koʻprogʻini esa AIA Group sugʻurta kompaniyasining 20,4 milliard dollarlik joylashtirishi taʼminlagan.
Hozirgi joylashtirishlarning sezilarli qismi sunʼiy intellekt va unga yondosh sohalarda faoliyat yuritayotgan Xitoy kompaniyalariga toʻgʻri keladi. Shu bilan birga, soʻnggi vaqtlarda investorlar bu sohalar vakillariga nisbatan ehtiyotkorroq munosabatda boʻla boshladi.
Ayrim kompaniyalar joylashtirish rejalarini keyingi yilga koʻchirdi. Yanvar oyida IPO uchun ariza topshirgan Baidu Inc. kompaniyasining sunʼiy intellekt chiplarini ishlab chiqaruvchi Kunlunxin boʻlinmasi endi birjaga faqat 2027-yilda chiqishni rejalashtirmoqda. Alibaba Group Holding T-Head chiplarini ishlab chiqarish biznesini IPOga tayyorlamoqda.
