Isteʼmolchilarning raqamli nusxalarini modellashtiruvchi sunʼiy intellekt startapi 300 mln dollar jalb qildi
Odamlar simulyatsiyasi biznesga modellardan turli xatti-harakat ssenariylari haqida soʻrab, mahsulotlar va reklama kampaniyalarini sinab koʻrish imkonini beradi
Simile startapi 2 mlrd dollar baholanganda 300 mln dollar jalb qildi. Bu haqda kompaniya hammuassisi va bosh direktori Jun Son Park maʼlum qildi.
Kompaniya odamlarning xatti-harakatlari modelini ishlab chiqmoqda: model inson yoki guruh haqidagi tavsifni qabul qilib, turli sharoitlarda ularning xatti-harakatlarini bashorat qiladi. Veb-interfeys foydalanuvchilari soʻrov oʻtkazish uchun auditoriyani tanlashi va unga istalgancha savol berishi mumkin.
Parkning soʻzlariga koʻra, CVS doʻkonlarning bezagi va reklama xabarlariga isteʼmolchilar qanday munosabat bildirishini oʻrganish uchun Simile bilan hamkorlik qilgan. Startap, shuningdek, moliya tashkilotlari va koʻngilochar industriya kompaniyalari bilan ham ishlaydi.
Simile turli sohalar uchun simulyatsiya qilingan panellarni shakllantiradi va hamkorlari, jumladan Gallup taqdim etadigan maʼlumotlardan foydalanadi. Parkning aytishicha, bunday tashkilotlar tadqiqotlarda qatnashishga rozi boʻlgan dunyo boʻylab 40 milliondan ortiq odam haqidagi maʼlumotlarni taqdim etadi; modellarni oʻqitishda tranzaksiyalar va odamlarning harakatlanishiga oid maʼlumotlardan ham foydalaniladi.
