Toshkent Amerikaning Oppenheimer kompaniyasi bilan munitsipal obligatsiyalar chiqarish masalasini koʻrib chiqdi
Tomonlar shahar tashabbuslari uchun investitsiyalar va moliyalashtirish manbalarini izlashni rejalashtirmoqda
Toshkentda Oppenheimer & Co. investitsiya-bank kompaniyasi bilan hamkorlik toʻgʻrisida kelishuv tuzildi.
Bundan oldin Toshkent hokimi Shavkat Umurzakov va Oppenheimer & Co. kompaniyasining Yevropa, Yaqin Sharq va Afrika mintaqasidagi investitsiya-bank yoʻnalishi bosh ijrochi direktori Maks Lami oʻrtasida muzokaralar boʻlib oʻtdi.
Uchrashuvda shaharning xalqaro kapital bozorlariga chiqishi va munitsipal obligatsiyalar chiqarishi mumkinligi koʻrib chiqildi. Shuningdek, yirik infratuzilmaviy va shaharsozlik loyihalariga mablagʻ jalb qilish, davlat-xususiy sherikligini rivojlantirish, xalqaro moliyaviy vositalar hamda shahar moliyasini boshqarishning xorijiy yondashuvlari muhokama qilindi.
Ishtirokchilar mahalliy mutaxassislarning malakasini oshirish masalasiga ham toʻxtaldi. Kelishuv xalqaro moliya institutlari va investorlar bilan hamkorlikni mustahkamlashi, shuningdek, Toshkentning istiqbolli loyihalari uchun qoʻshimcha mablagʻ manbalarini topish imkonini berishi kutilmoqda.
