OpenAI bilan hamkorlik Microsoft kompaniyasiga yiliga 40 milliard dollargacha daromad keltirmoqda
Hamkorlik IT giganti daromadlarining qariyb 11 foizini taʼminlamoqda
Microsoft faqat bir chorak — iyuldan sentyabrgacha boʻlgan davrda — OpenAI bilan hamkorlikdan 10 milliard dollar daromad oldi. Bu IT gigantining uch oy ichidagi jami tushumining qariyb 11 foiziga teng.
Oʻtgan yili hamkorlik Microsoft kompaniyasiga 24,1 milliard dollar keltirgan edi. Hozirgi surʼat saqlansa, bu koʻrsatkich yiliga 40 milliard dollargacha oshishi mumkin.
OpenAI neyron tarmoqlarini oʻqitish va ishlatish uchun Azure bulut serverlaridan foydalangani evaziga Microsoft kompaniyasiga haq toʻlaydi. Shuningdek, u oʻz daromadlarining bir qismini ham beradi — ekspertlar bahosiga koʻra, bu ulush qariyb 20 foizni tashkil etadi.
Paradoks shundaki, kompaniyalar mijozlar uchun tobora kuchliroq raqobatlashmoqda, OpenAI esa boshqa hamkorlarni ham jalb qilmoqda. Shunga qaramay, ularning bir-biriga moliyaviy qaramligi tarixdagi eng yuqori darajaga yetdi.
