Oʻzbekistonda oktabr oyida eskrou orqali 33 631 ta bitim rasmiylashtirildi
Shundan 16 893 tasi koʻchmas mulk boʻyicha shartnomalar, 16 738 tasi esa transport vositalari boʻyicha operatsiyalar boʻlgan
Bir oy davomida eskrou hisobvaraqlari orqali koʻchmas mulk va avtomototransport vositalarini oldi-sotdi qilish boʻyicha 33 631 ta shartnoma rasmiylashtirildi. Turar joy va noturar joy segmentlarida 16 893 ta bitim tuzildi — bu sentabr oyidagidan 182 ta shartnoma yoki 1,1 foizga koʻp. Yana 16 738 ta operatsiya transport vositalari bozoriga toʻgʻri keldi.
Eng koʻp bitim Toshkent shahrida roʻyxatdan oʻtkazildi — 10 674 ta yoki mamlakat boʻyicha jami bitimlarning 31,7 foizi. Viloyatlar va Qoraqalpogʻiston Respublikasiga operatsiyalarning jami 68,3 foizi toʻgʻri keldi. Fargʻona viloyatida 3 121 ta, Samarqand viloyatida 2 933 ta, Namangan viloyatida esa 2 179 ta bitim rasmiylashtirildi.
Bundan tashqari, tijorat banklari oktabr oyida 6 509 ta operatsiya haqida maʼlumot taqdim etdi. Shundan 3 555 tasi koʻchmas mulk oldi-sotuviga, 2 954 tasi esa avtomototransport vositalarini xarid qilishga taalluqli boʻlgan.
