AQSh saylovlarida demokratlar erishgan yutuqlar fonida Osiyo aksiyalari va dollar pasaymoqda
Demokratlar AQSh Senati ustidan nazoratni qoʻlga kiritdi va Vakillar palatasida koʻpchilik boʻlishga yaqinlashdi
Chorshanba kuni Osiyo aksiyalari bozorlari pasaydi: Tokio indeksi 2,85 foizga tushdi. Shu bilan birga, oraliq saylovlardan keyin AQSh siyosatining keyingi yoʻnalishi borasidagi noaniqlik fonida dollar asosiy valyutalarga nisbatan zaiflashdi.
Yevropada ertalabga kelib demokratlar Senat ustidan nazoratni oʻrnatdi va dastlabki natijalarga koʻra, Vakillar palatasida koʻpchilikni qoʻlga kiritishi mumkin edi. Bu ikkinchi muddatining dastlabki ikki yilida Kongressning har ikki palatasini nazorat qilgan prezident Donald Tramp va Respublikachilar partiyasi uchun jiddiy magʻlubiyat boʻlardi.
Saylovchilarning kayfiyatiga turmush xarajatlari, jumladan, benzin va dizel yoqilgʻisi narxlarining yuqoriligi taʼsir koʻrsatdi. Ayrim kampaniyalarda maʼlumotlarni qayta ishlash markazlarini qurish masalasi ham muhokama qilindi. Xususan, Ogayo shtatidagi Senat uchun poygada respublikachi Jon Hyusted demokrat Sherrod Braunga yutqazdi.
Saylov natijalari sunʼiy intellektning rivojlanishiga taʼsir qilishi mumkin. Uoll-stritdagi ayrim investorlar demokratlarning Kongress ustidan toʻliq nazorat oʻrnatishi ushbu sohaga nisbatan tartibga solishni kuchaytirishi va cheklovlar joriy etilishiga olib kelishidan xavotirda. Bozorlar uchun sezgir boʻlgan boshqa mavzular qatorida AQShning budjet siyosati, mudofaa xarajatlari, shuningdek, sogʻliqni saqlash, banklar va kriptovalyutalarni tartibga solish masalalari bor.
Shu bilan birga, hokimiyatning boʻlinishi Vashingtondagi oʻzgarishlar koʻlamini cheklashi mumkin. Tramp demokratlar Kongress ustidan nazoratni qoʻlga kiritsa, demokratlar tashabbuslarini toʻsib qoʻyadigan “Janob Veto”ga aylanishini aytdi, biroq keyinchalik tomonlar oʻrtasida kelishuvlar tuzilishi ehtimoli ham bor.
Pepperstone tahlilchisi Kris Ueston bunday siyosiy konfiguratsiya siyosiy boshi berk koʻchaga, budjet va davlat qarzi chegarasi atrofidagi bahslarga, shuningdek, Kongressdagi tekshiruvlarga olib kelishi mumkinligidan ogohlantirdi. Uning baholashicha, prezident shu bilan birga ijro etuvchi salmoqli vakolatlarini saqlab qoladi, shu sababli ayrim sohalar uchun oqibatlar bir maʼnoli emas. Ueston, shuningdek, demokratlarning cheklangan gʻalabasi allaqachon narxlarda hisobga olingan boʻlishi mumkin, deb hisoblaydi. Ishonchli natija esa bozorlarni Trampning qolgan kun tartibi va 2028 yilgacha boʻlgan siyosiy yoʻnalishini qaytadan baholashga majbur qilgan boʻlardi.
Ertalab asosiy Yevropa indekslari fyucherslari 0,3 foizdan 0,5 foizgacha pasaydi, Euro STOXX 50 boʻyicha kontraktlar esa yanada kuchliroq tushdi. Yevro dollarga nisbatan mustahkamlandi, funt sterling qimmatlashdi, iyena esa Amerika valyutasiga nisbatan koʻtarilishda davom etdi. Germaniya va Fransiya davlat obligatsiyalari daromadliligi biroz pasaydi. AQSh gʻaznachilik obligatsiyalarining daromadliligi dastlab tushganidan keyin yana koʻtarila boshladi.
Pasayish Tokio, Shanxay, Sidney, Seul va Singapur bozorlariga taʼsir qildi, Gonkong bozori esa oʻsdi. Texnologiya kompaniyalari aksiyalari ham bosim ostida qoldi: investorlar sunʼiy intellektga milliardlab mablagʻ kiritgan kompaniyalar bu investitsiyalardan qachon daromad ola boshlashiga shubha qilmoqda.
OpenAI investori boʻlgan SoftBank Group aksiyalari avvalroq 8 foizga pasaygan edi. Janubiy Koreyaning Kospi indeksi ertalabki sessiyani pasayish bilan yakunladi, Gonkongning Hang Seng indeksi oʻsdi, Shanghai Composite esa pasaydi. Seshanba kuni mamlakat markaziy banki foiz stavkasini oshirgach, Avstraliya bozori ham qiymatining bir qismini yoʻqotdi. Tayvanning Taiex indeksi pasaydi.
Bir kun avval S&P 500 indeksi oʻsdi, garchi uning tarkibidagi aksiyalarning aksariyati arzonlashgan boʻlsa-da. Dow Jones Industrial Average pasaydi, Nasdaq Composite esa koʻtarildi.
Neft ham arzonlashdi: ertalab Brent narxi bir barrel uchun 104 dollardan pastda savdo qilindi, AQShning etalon navi esa qariyb 96 dollarni tashkil etdi. Shu bilan birga, oltin deyarli 0,5 foizga qimmatlashdi.
