Bloom Energy aksiyalari maʼlumotlar markazlari uchun energiyaga boʻlgan ehtiyoj fonida 16 foizga oʻsdi
Qattiq oksidli yonilgʻi elementlari ishlab chiqaruvchisi 1,24 mlrd dollar miqdorida rekord tushum oldi — bu bir yil avvalgidan 138 foiz koʻp
Savdolar oʻrtalariga kelib Bloom Energy aksiyalari taxminan 16 foizga oʻsdi, sunʼiy intellekt infratuzilmasiga energiya yetkazib beruvchi boshqa kompaniyalar aksiyalari ham qimmatlashdi. Bunga CoreWeaveʼning hisoboti sabab boʻldi: kompaniya natijalari investorlarning maʼlumotlar markazlari qurilishini moliyalashtirish borasidagi xavotirlarini kamaytirdi.
Uchinchi chorakda Bloom Energy 1,24 mlrd dollar miqdorida rekord tushum oldi — bu bir yil avvalgidan 138 foiz koʻp. Kompaniya 2026-yil uchun tushum prognozini yil davomida uchinchi marta oshirib, 4,4–4,6 mlrd dollarga yetkazdi va S&P 500 indeksiga kiritildi. Shu bilan birga, operatsion pul oqimi manfiyligicha qoldi va 27,1 mln dollarni tashkil etdi.
Bloom Energy bosh direktori K. R. Shridhar 22-oktabr kuni investorlar bilan uchrashuvda elektr energiyasiga boʻlgan talab nafaqat sunʼiy intellekt, balki raqamli iqtisodiyotning boshqa segmentlari hisobiga ham oshishini aytdi. Evercore tahlilchisi Nikolas Amicchining fikricha, CoreWeaveʼning narxlar haqidagi izohlari talab mavjud taklifdan hamon yuqoriligini koʻrsatmoqda. Uning hisoblashicha, energiya taʼminotiga ulanish tezligi va aniqligi hali uzoq vaqt davomida muhim ustunliklar boʻlib qoladi.
CoreWeave hisobotiga ijobiy munosabat Bloom Energyʼning yirik mijozlaridan biri boʻlgan Nebius Groupʼni ham qoʻllab-quvvatladi. Kompaniya moliyaviy natijalarini payshanba kuni eʼlon qilishi kerak.
Oyning boshida Bloom California Resources Corporation bilan Kaliforniyadagi uglerodni tutib olish loyihalarini oʻrganish boʻyicha majburiy kuchga ega boʻlmagan kelishuv tuzdi. Keyinroq kompaniya Yaponiyaning NTT texnologik guruhi bilan NTT Data Groupʼning dunyoning turli hududlaridagi bir nechta maʼlumotlar markazlariga yonilgʻi elementlarini yetkazib berish boʻyicha kelishuvga erishdi.
